Þessi mánuður byrjaði nú aldeilis vel hjá mér, ég er alltaf að græða!!! En þannig var, að amma og afi vöktu mig um hádegi 2. febrúar og færðu mér svakalega flott rúm, dótakassa á hjólum og náttföt. Ég var að vonum sperrtur með rúmið mitt enda vaggan orðin í minna lagi. Í rúminu var þessi fína eggjabakkadýna og nú gat ég loksins sett upp spilaóróann frá Söru frænku minni. Mér líkaði strax vel við rúmið mitt og þó að ég sofni nú ekki alltaf þar þá er ég duglegur að sofa þar þegar ég er færður í mitt rúm. Ég held nú samt að það sé allt mömmu að kenna að ég sef ekki alla nóttina í mínu rúmi. Henni finnst nefnilega svo gott að sofa hjá mér að alltaf þegar ég vakna, svona milli kl. 6 og 7 á morgnana, þá tekur hún mig uppí og vill bara alls ekki skila mér aftur í mitt rúm þegar ég er búinn að drekka. Svo fer pabbi í vinnuna uppúr kl. 8 og þá verður nú mamma að hafa einhvern til að lúlla hjá og þá er víst ekki um neinn að ræða nema mig. Svo vöknum við oftast um kl. 10:30 og dutlum (eins og mamma segir) fram undir hádegi, skiptum um bleiu og dúllum okkur. Svo sofna ég nú oftast fljótlega eftir hádegi í minn hálftíma og svo reynum við að fara út.

18. febrúar byrjaði ég á nýju sundnámskeiði og tek aftur 10 skipti. Ég fékk viðurkenningar-
skírteini fyrir fyrra námskeiðið og ætla helst að fá annað svoleiðis. Ég fékk reyndar eitthvert nefrennsli og er búinn að vera mest inni í rúma viku. Svo talaði mamma við lækninn okkar og hann sagði að mér væri nú alveg óhætt að skreppa í sundið.

Síðan gerðist sá stóratburður 19. febrúar að pabbi fann fyrstu tönnina mína og svo fékk ég aðra 20. febrúar. Þannig að nú er ég með tvær tennur í neðri góm. En það breytir ekki því að ég geri ekki annað en að naga allt sem fyrir mér verður og finnst mér hendurnar á mér svakalega freistandi. Áðan í sundinu (20. feb. 02) þá nagaði ég eyrað á pabba frekar en ekki neitt.

Það hafa nú svo sem ekki neinir stóratburðir átt sér stað, nema helst það að amma Guðrún kom með skírnarmyndina mína og verð ég nú að segja það að hún er algjör snillingur “keddlíngin”....!!! Þetta er einhver fallegasta mynd sem við hér höfum séð. Myndin heitir: “Tommi og Jesú”, segir amma og svo er Guð á henni líka. Þetta er útsaumað listaverk og þið ættuð bara að sjá hana.

Óskar frændi kom líka frá Boston og kom með tannkrem og tannbursta og gallasmekkbuxur handa mér.

Annars er ég bara búinn að vera þokkalega þægur og góður og hef sinnt mínum skyldum eins og gengur, farið í sund x2 í viku og alltaf staðið mig rosalega vel. Við mamma fórum bara tvö á mánudaginn síðasta, enda var pabbi nýkominn heim frá Sviss. Hann kom með Gorm handa mér og bjöllu sem spilar nokkur lög. Ég saknaði pabba nú svolítið, þó að hann hefði bara verið í burtu í fjóra daga, en maður getur nú fengið leið á svona kellingum eins og henni mömmu.